Құрметті қала тұрғындары! Қадірменді жерлестер! Баршаңызды елдігімізді паш ететін тамаша мерекелердің бірі – Астана күнімен шын жүректен құттықтаймын! Астана – еліміздің мақтанышы, мерейі, мәртебесі. Бірлік пен берекенің, Отанымыздың телегей табыстарының символы. Бүгінгі заманның талабына сай сәні мен салтанаты келіскен Астана жарқын болашақтың, кемелді келешектің кепілі іспеттес. Тарихқа көз жүгіртсек, бұл күні қалаға астана мәртебесін беруге қатысты алғашқы құжат қабылданды. 1994 жылы 6 шілдеде Қазақстан Республикасының Жоғарғы Кеңесі «Астананы Ақмола қаласына көшіру туралы» қаулы қабылдады. Елорданы Алматыдан басқа қалаға көшіру туралы шешімнің бірнеше себебі бар еді. Соның ішінде Қазақстанның оңтүстік шекарасында орналасқан Алматының өнеркәсіп орталықтарынан шалғай орналасуы ықпал етті. Ақмола облыстардың ішінде алдыңғы қатарда болды. Сонымен қатар бұрынғы астананы одан әрі кеңейту мүмкіндігі аз болды, ал Ақмоланың бұл жағынан перспективасы зор. Қазақстан Республикасының жаңа астанасы ретінде Астана қаласының халықаралық тұсаукесері 1998 жылы 10 маусымда өтті. Одан кейін 10 жыл бойы қала күні жергілікті халық арасында 10 маусымда аталып келді. Ал 2008 жылы мерекелер туралы заңға қосымшалар енгізіліп, соған сәйкес Астана күні мемлекеттік мереке болып бекітілді. Осылайша қазақ елі «Астана күнін» 6 шілдеде атап өтеді. 1997 жылы орталық мемлекеттік мекемелер Ақмолаға ресми көшірілгеннен кейін елордаға қатысты тағы бір маңызды шешім қабылданды. 1998 жылы 6 мамырда Қазақстан Республикасы Президентінің Жарлығымен қалаға «Астана» деген жаңа атау берілді. Отанымыздың жүрегі – Елордамыз Астананың жұлдызы әрқашан жарық болсын! Астана – еліміздің зор қуаты. Алдағы уақытта да Астана қайталанбас келбетімен, ұшқыр жаңашылдығымен елдің көшін түзей беретініне сенім мол. Елорданың мерекесі әрбір азаматтың жүрегіне қуаныш ұялатып, ертеңге деген сенімді шындай түсуде. Сіздерге бақытты да баянды өмір, зор денсаулық, шаңырақтарыңызға шаттық пен қуаныш, құт-береке тілеймін. Сүйікті Елордамыз Астана көркейе берсін! Мереке құтты болсын!
Шымкент қаласының әкімі М. Әйтенов Астана күнімен құттықтады
