Бүгін қала әкімі Ғабит Сыздықбеков «Таза Қазақстан» республикалық экологиялық акциясын ұйымдастыру бойынша арнайы жиын өткізді. Онда қала аумағында тазалық шараларын тиімді ұйымдастырудың тетіктері қарастырылып, өзекті мәселелер пысықталды. Республикалық экологиялық акциясын өткізу жөніндегі іс-шаралар жоспары бекітілді. Акция аясындағы атаулы 5 аптада тұрғындар, қоғам белсенділері, ұйымдар, кәсіпорындар өздеріне тиесілі аумақтарды, аулаларды тазартады. «Киелі мекен» шарасы аясында тарих және мәдениет ескерткіштерінің аумағына абаттандыру жұмыстары жүргізіліп, «Жасыл аймақ» аптасында ағаш көшеттері отырғызылады. Ал «Өнегелі ұрпақ» аптасы ардагерлердің аулалары мен қарттар үйлерінің аумақтарын тазалаумен ерекшеленсе, «Мөлдір бұлақ» шарасы шеңберінде су айдындарының жағалауы қоқыстан тазартылады. Қоршаған ортаның тазалығына жауапкершілікпен қарау – әрбір азаматтың басты міндеті. Туған жерімізді, туған қаламызды аялау, оны көздің қарашығындай қадірлеу ортақ іс. Дегенмен бұл бағытта қаншама түсіндірме жүргізіліп, қанша үндеулер айтылғанымен туған мекеніміздің тазалығы көңіл көншітпей тұр. Көктемгі екі айлық сантиарлық жұмыстар аясында мемлекеттік мекемелер тарапынан тиісті жұмыстар атқарылды. Аталған жұмыстар жуырда тағы басталып, екі айлық тазалық айлығы басталғанын білеміз. Апта сайын сенбілік шаралары өтуде. Алайда қаланың шет аймақтарына қоқыс тасталып жатқанын жиі көзіміз шалады. Тазаланған жер таза емес, ластамаған жер таза. Осы қанатты сөздің өміршеңдігіне бүгінде әбден көзіміз жетті. Сана тазармай, қала тазармайтыны секілді, әр адам тазалықты өзінен бастар болса, қаламызда тазалық жөнінен мәселе қозғалмас еді. Қала әкімі жауаптыларға белсенді азаматтармен тығыз жұмыс жүргізіп, жергілікті халықты сенбіліктерге тартуда нақты тапсырмалар берді. Бұл бағыттағы шаралардың тұрғындар жауапкершілігін арттырып, қала тазалығын жақсартуда маңызы зор.Шымкент қаласы әкімінің баспасөз қызметі
