Қала әкімі Қаратау ауданына қарасты “Белсенді ұзақ өмір орталығы” филиалында болды. Бұл бірегей жоба зейнеткерлер арасында үлкен сұранысқа ие. Жалпы мұнда 100-ге жуық зейнеткер екі ауысыммен арнайы әлеуметтік қызмет алады. Орталыққа келгеннен кейін олар ең алдымен, алғашқы медициналық тексеруден өтеді.
Мұнда емдік дене шынықтыру, йога кабинеттері, би және фитнес залдары жұмыс істейді және ағылшын, араб тілдерін үйренуге арналған сабақтар жүргізіледі. Мекемеде білікті мамандар, дәрігерлер мен психологтар қызмет атқарады.
Әрі қарай “Оңтүстік” индустриалдық аймағында “BESKUDUK TAS” ЖШС-не барып, жұмысымен танысты. Бұл кәсіпорын коралл түстес табиғи тас өндіру әрі өңдеумен айналысады. Өндірілетін өнім плитка және кірпіш түрінде болады және ғимараттарды қаптауға пайдаланылады. Сондай-ақ, “Kaspy Steel” ЖШС-нің қызметімен танысты. Литейлік зауыт жыл сайын 1000 тонна болат пен шойын өнімін шығарады.
Компания басшылығы технологиялық процестерді дамыту мен жетілдіру жоспарлары туралы ақпарат берді. Қала әкімі заманауи экологиялық технологияларды енгізу мен пайдаланудың маңыздылығын атап өтті. Ең алдымен, олар қоршаған ортаға теріс әсерлерді төмендетуге бағытталуы тиіс, — деді шаһар басшысы.
Сонымен қатар, қала әкімі Абай ауданындағы тағы бір тұрғын алабы газдандырылуына байланысты шараға қатысты. Сондай-ақ, қала әкімі Ғабит Сыздықбеков 60 мыңнан астам халқы бар Абай ауданы тұрғындарын газдандыруға бастау берді. Тұрғындар осыған дейін сұйытылған газды күнделікті қолданып келген.
Газ құбырының құрылысы 2022 жылы басталған. Қала басшысы халықты сапалы қызметпен қамтуда жауаптыларға газ құбырын ерте кезеңде пайдалануға беруді тездетіп аяқтауды тапсырды.
