Нұрсәт шағынауданында ескі жарық жүйелері жаңартылуда. Бүгін қала әкімі Мұрат Әйтенов елдімекендегі электр желілерінің құрылысымен танысып, жұмыс барысын қадағалады. Осыған дейін қуаттылығы 10 кВ 2 дана электр тарату бекетінің құрылысы аяқталып, іске қосылды. Қазір мұнда тарату бекетінен шығатын 10 кВ кабель желісін салу, қазылған жерлерді қайта қалпына келтіру жұмыстары жүргізілуде. Арнайы бригадалар тұрғын үйлерді жаңа желіге ауыстыруда. Шағынауданды сапалы жарықпен қамту жұмыстарына 30 адам 5 техника жұмылдырылған.
«Құрылыс кезінде болатын уақытша қолайсыздықтар туралы жергілікті тұрғындарды алдын ала ескертуді ұйымдастырыңыздар. Жұмыстарды маусым айына дейін аяқтау қажет» — деді қала әкімі.
Соңғы талаптарға сай жер астымен жүргізіліп жатқан 36 шақырымдық электр желілері толықтай іске қосылғанда шағынаудандағы 12 мыңнан астам абонент сапалы жарыққа қол жетізеді. Қала әкімі жауаптыларға құрылыс жұмыстарын сапалы, өндірістік кестеге сай атқаруды тапсырды.
Айта кетейік, биыл 6 елдімекенде сапалы электрмен қамту жұмысы қарқынды жүріп жатыр. Жыл соңына дейін Достық, Тұран, Нұртас, Сәуле, Жаңаталап елдімекендерінде құрылыс жұмысы аяқталып, 22 мыңға жуық халық сапалы электрмен қамтылуға мүмкіндік алады деп жоспарланып отыр.Абай ауданы Солтүстік саяжай елдімекенін сапалы электр қуатымен қамту толығымен аяқталды. Қазіргі таңда тұрғын үйлерді абоненттеу жұмысы жүргізіліп жатыр. Құрылыс барысында жалпы саны 4 773 электр бағанасы мен 70 трансформатор орнатылып, 145 шақырым электр желілері тартылды. Нәтижесінде елдімекендегі 5 784 абонент сапалы электр қуатымен қамтылмақ. Есеп беру жиынында шаһардағы 86 елді мекеннің 46-да сапалы электр жеткізілгенін, ал 35-де таратылып жатқан жарықтың сапасы төмен екені мәлімделген. Бұл көрсеткіш әлі күнге дейін өзгерген жоқ. Жергілікті билік «Бозарық» подстанциясының аяқталып, ел игілігіне тапсырылуы аталған санайғақтардың оң бағытта өзгеруіне сеп беретінін алға тартуда.
