Елімізде бірқатар облыста су тасқыны орын алып, қаншама елдімекен зардап шекті. Осыған байланысты, Шымкент қаласынан төтенше жағдай жарияланған облыстарға жалпы саны 200 техника жіберілді. Қала әкімі Ғабит Сыздықбеков техникаларды тиеу және жөнелту жұмыстарының барысымен танысты. Қала әкімдігіне қарасты басқармалар мен жеке компаниялар техникаларды пойызға тиеп, топан судан зардап шеккен облыстарға жөнелтті.Оның ішінде елдімекенді тазартуға, бөгеттерді алуға және жер қазуға көмектесетін жүк көлігі, экскаватор және бульдозер сынды техникалар бар.
Атырау, Ақтөбе, Батыс Қазақстан және Солтүстік Қазақстан облыстарында су тасқынына қарсы іс-шаралар, тасқын салдарын жою және халыққа көмек көрсету бойынша жұмыстар жалғасып жатыр.
Батыс Қазақстан облысында жағдай тұрақталды. Төтенше жағдайлар және полиция департаментінің қызметкерлері бірлесіп, су басқан аумақтарын күзетуде.
Көмекке барған Ақтөбе, Түркістан облыстарының құтқарушылары Жайық өзенінің бойында орналасқан елді мекендерде су тасқынына қарсы іс-шаралар жүргізу үшін Батыс Қазақстаннан Атырау облысына жіберілді.
Атырау облысында Жайық өзенінде судың деңгейі көтерілгені байқалады. Атырау қаласында бөгеттерді салу жұмыстары үздіксіз жүргізіліп жатыр. Бүгінгі таңда ұзындығы 240 км қорғаныс бөгеттері нығайтылды.
Атырау облысы Жылыой ауданы Құлсары қаласында осы жылдың 4 сәуірінен бастап төтенше жағдай жарияланды.
Қазіргі таңда 1210 тұрғын үй – су астында. Су тасқыны басталғалы бері Жем өзінің деңгейінің төмендеуіне байланысты 1710 жеке тұрғын үйден және басқа да нысандардан су тартылды.
Облыста су тасқыны басталғалы 36 738 тұрғын, оның ішінде 8392 бала эвакуацияланды. 13 мыңнан астам мал қауіпсіз жерге айдалды.
Сонымен қатар, бұған дейін қалалық төтенше жағдайлар департаментінен құтқарушылар мен техникалар көмекке аттанған еді. Олар қазір су шайған елдімекендерде апаттық-құтқару және шұғыл жұмыстарды жүргізуде қол ұшын созып жатыр.Шымкент қаласы әкімінің баспасөз қызметі
