Шымкент қаласында Республика күні қарсаңында мемлекеттік тілді дәріптеуге арналған «Мемлекеттік тіл – тәуелсіздік символы» атты байқау өтті. Бұл шараны қалалық Тілдерді оқыту-әдістемелік орталығы ұйымдастырды, ал оның басты мақсаты – қазақ тілінің қолданылу аясын кеңейтіп, мемлекеттік тілге деген қызығушылықты арттыру.
Елімізде мемлекеттік тілді үйренуге барлық мүмкіндіктер жасалып келеді. Арнайы оқыту орталықтары мен мектептер, жоғары оқу орындары қазақ тілін меңгеру үшін қажетті жағдайларды ұсынады. Қазақ тіліне деген қызығушылық тек қазақ ұлтының өкілдерімен шектелмей, өзге этнос өкілдері арасында да артып келеді. Бұл мемлекеттік тілдің әлеуметтік мәртебесін жоғарылату ісіне, мемлекеттік тілді рухани-мәдени құндылық ретінде дәріптеуге қосқан үлес. Мәселен, №48 жалпы орта мектебінің ұстазы Мафтуна Сейдова байқауға қатысуға шешім қабылдағанын атап өтті. Қазақ тілін бала кезінен жетік меңгерген ол, байқау арқылы тілге деген құрметі мен сүйіспеншілігін көрсетіп, өзгелерге үлгі болуды мақсат еткен.
Байқау үш кезеңнен тұрды. Бірінші кезең – «Жұлдызды сәт», онда қатысушылар өз өнерлерін – ән айту, би билеу немесе көркемсөз оқуды көрсетті. Екінші кезеңде Отан, ел, туған жер туралы мақал-мәтелдерді жалғастыру сынағы өтті. Ал шешуші кезеңде салт-дәстүрлер мен белгілі тұлғалар туралы білімдерін паш етті. Тіл жалықпай үйренген жастың жүрегіне құйылатын нұр, олардың болашақ өмірінің Темірқазығы. Көбісі осы тілдің қасиеті арқасында ел игілігі жолында әртүрлі жауапты қызмет атқарып жүргенін көруге болады.
Байқауға іріктеліп өткен 21-35 жас аралығындағы түрлі этнос жастары қатысты. Қазылар алқасы жеңімпаздарды анықтап, І, ІІ және ІІІ орын иегерлеріне бағалы сыйлықтар табыстады. Сондай-ақ, барлық қатысушылар алғыс хаттармен марапатталды.
