Қазақстан Республикасы Ішкі істер министрі Марат Ахметжановтың бұйрығымен Түркістан облысы Полиция департаменті бастығының бірінші орынбасары лауазымына полиция полковнигі Бағланбек Есембекұлы Айтпаев тағайындалды. Тағайындау ҚР ІІМ Нұр-Сұлтан қаласында онлайн-режимде өтті.
Полиция полковнигі Б.Айтпаев ҚР ІІМ Б.Момышұлы атындағы Шымкент заң колледжі мен А.Мырзахметов атындағы Көкшетау университетін заңгер мамандығы бойынша бітірген.
Ішкі істер органдарында 1998 жылдан бастап қызмет атқарады. Еңбек жолын Ақмола облысы ІІБ Целиноград АІІБ Әкімшілік полиция бөлімшесінің инспекторы болып бастады. Одан әрі Ақмола облысы ІІБ Целиноград АІІБ-де және ҚР ІІМ Әкімшілік полиция комитетінде түрлі басшылық лауазымдарда жұмыс істеді. 2021 жылдың қаңтар айынан бастап ҚР ІІМ Әкімшілік полиция комитетінің қоғамдық тәртіпті қорғау басқармасын басқарды.
«Ерлігі үшін», «Қазақстан Республикасының Тәуелсіздігіне 25 жыл» «Қазақстан Конституциясына 30 жыл», «Қазақстан полициясына 30 жыл» медальдарымен марапатталған.
Түркістан облысы ПД бастығының бірінші орынбасарын жеке құрамға Түркістан облысы ПД бастығының міндетін атқарушы полиция полковнигі Асылжан Қалдарбеков таныстырып, жұмысына табыс тіледі.
Түркістан облысы ПД бастығының бірінші орынбасары болып полиция полковнигі Айтпаев Бағланбек тағайындалды
