Уақыттан жылдам не бар екен, шіркін! Зырылдаған уақыт, қыбырлаған адам… Әрқайсымыз күнделікті күйбең тірлігімізбен тырбанып жүріп айналамызда қандай өзгерістер орын алып жатқанын кейде аңғармай да қаламыз. Ал бір сәт ойлана көз тоқтатып қарағанда мүлде басқа суретті көреміз. Иә, егер жақсы жағына қарай өзгеріс болса, онда игі жұмыстардың жасалып жатқаны.
Осыдан он шақты жыл бұрын ғана екінің бірі Шымкентті «Үлкен ауыл» деп атап жататын. Арада көп те уақыт өткен жоқ, Шым шаһарымыз бұл күнде адам танымастай өзгеріп шыға келген. Шымкент – сұлу көркімен де, «сұлу мінезімен» де көпшілікті өзіне тартпай тұрмайды.
Шымкент қаласы «Республикалық маңызы бар қала» статусына ие болып, облыстан бөлініп шыққан соң ерекше түрленіп шыға келді десек, артық айтқанымыз бола қоймас. Орта Азияның әрі алып, әрі ару қалаларының біріне айналып келе жатқан шаһарымыз әрбірімізге ыстық мекенге айналған. Көз тартар ғимараттар, демалыс орындары салынуда. Соған сай шымкенттіктер де өздерін нағыз мегаполис тұрғындарындай сезініп келеді.
Әрине, қала көркі тек әсем де биік ғимараттарымен өлшенбейді. Қала көрікті болу үшін оның көшесі, инфрақұрылымы, тазалығы, жайлылығы бір-бірімен үйлесім табуға тиіс. Шымкентті сондай деңгейге жеткізу үшін қала билігі де қолдан келген істі атқарып, тынбай жұмыс жасап жатқаны көрінеді. Қала әкімі Мұрат Әйтенов жүргізіліп жатқан жұмыстарды кабинетте отырып қана бақылап отырған жоқ, әрдайым құрылыс нысандарын аралап, тиісті тапсырмаларды дәл сол жұмыс басында тұрып беріп жатады. Басшылық тарапынан талап күшті болса, жұмыстың да жүйелі жүретіні айтпаса да белгілі жағдай ғой. Сондықтан Шымкент республика бойынша көптеген салалар бойынша алға шығып келеді. Бұл қуантарлық жағдай.
Сөзіміз дәлелді болу үшін қаламызда атқарылып жатқан жұмыстардың бірқатарынан ақпарат бере кетейік.
