Қала әкімі Ғ.Сыздықбековтің тапсырмасына сәйкес көне саябақ жаңартылды. Есіл және Камал көшелерінің арасындағы 0,5 га жерді қамтитын аумақтағы қоғамдық орын бүгін пайдалануға берілді.
Ұлт саулығын жақсарту мақсатында саябаққа 200 ш.м құрайтын заманауи баскетбол алаңшасы, балалар ойын және спорт алаңшалары, 3 әткеншек, 2 теннис үстелі, 1 шахмат үстелі орнатылды. Жаңа серуендеу аймағында 4000 ш.м аумақ көгалдандырылып, шынар, гуджу, каштан ағаш көшеттері мен көпжылдық сәндік гүлдер отырғызылды.
Сондай-ақ, саябаққа ауызсу бұрқағы, тегін автотұрақ, орындық, қоқыс жәшігі, пергола, жарықшам бағаналары және декоративті тастар орнатылды.
Бұл аумақта 10-нан астам көбқабатты үй мен 500-ден астам жеке тұрғын үй шоғырланған. Шамамен 2000-нан астам тұрғын бар.
Сонымен қатар, Әл-Фараби ауданы А.Диваев көшесінде және С.Жандосов, Жібек жолы көшелерінің қиылысында тағы бір жаңа гүлзарлармен толықты. Ашылу салтанатына қала әкімі Ғабит Сыздықбеков қатысып, тұрғындарды құттықтады.
Аумағы 0,31 гектарды құрайтын гүлзар А. Диваев көшесінде орналасқан. Ал, С.Жандосов және Жібек жолы көшелерінің қиылысындағы гүлзар 0,2 гектарды құрайды. Барлық гүлзарға шынар, гуджу, каштан ағаштары мен көпжылдық сәндік гүлдер отырғызылды.
А. Диваев көшесінде орналасқан гүлзарға құрылыс барысында 1031 шаршы метрге мәрмәрдан жасалған аяқжол төселіп, 1014 шаршы метр аумақ көгалдандырылды. Тұрғындар мен қонақтардың қолайлығы үшін 2 велотұрақ, ауызсу бұрқағы және ерекше фотоаймақ та қарастырылған.
Бұдан бөлек, 3 300 адам тұратын 20 көпқабат үй айналасында салынған гүлзарда балаларға арналған әткеншек, шахмат үстелі, теннис үстелі, мәрмәр орындықтар, қоқыс жәшігі, вазон, жарықшам бағаналары, пергола және декоративті тастар орнатылған.
С.Жандосов және Жібек жолы көшелерінің қиылысындағы жаңа гүлзардағы серуендеу орнында ескі субұрқақ пен көпір күрделі жөндеуден өтіп, канал аумағы толық қоршалды. Сондай-ақ заманауи үлгідегі 8 дана орындық, 5 дана қоқыс жәшігі, әткеншектері бар 4 бастырма, 1 үстел теннисі, 4 вазон мен 6 декоративті тас та орнатылды.
Айта кетерлік жәйт, 819 шаршы метр аумақ көгалдандырылды. Қала тұрғындарының қолайлылығы үшін тегін автотұрақ салынып, 764 шаршы метр аяқжол төселді. Бұл аумақта жалпы 15 көпқабатты тұрғын үй, 2700 ден аса тұрғын бар.
Жергілікті азаматтар жаңа демалыс аймағының салынғанына қуанып, ризашылығын білдірді.
Шымкент қаласы әкімінің баспасөз қызметі
