Бүгін Шымкент қаласындағы Кеңес Одағының Батыры генерал Сабыр Рақымов атындағы республикалық «Жас ұлан» мектебінің барлық тәрбиеленушілері үшін жаңа оқу жылының басталуын білдіретін алғашқы қоңырау соғылды.
Мектепте 400-ге жуық ұлан білім алады, оның шамамен 250-і биылғы жылы мектеп тәрбиеленушілері атанды.
Алғашқы қоңырау салтанатты рәсімі Кеңес Одағының Батыры генерал Сабыр Рақымовтың мүсініне гүл шоқтарын қоюдан басталып, іс-шараға шақырылған құрметті қонақтардың құттықтау сөздерімен жалғасын тапты. Әскери мамандықтардың талабына сай бола алатындай білім берушілер мен білім алушылардың жаңа оқу жылына деген дайындықтарымен таныс болды. Мектеп буынынан кейінгі әскери академиялық білім ошағы жаңа бағдарламаларды таныстырып өтті.
Жаңа оқу жылының басталуына арналған құттықтау сөзінде 1-ші оқу ротасының ұланы Мирас Серік тәрбиеленушілердің атынан мектеп басшылығына қамқорлығы үшін алғыс білдіріп, ұланның абыройына нұқсан келтірмей жақсы оқу үшін барлық күш-жігерлерін салатынына сендірді.
Оқу жылына бастама беретін алғашқы қоңырау соғу 1-ші оқу ротасының ұланы Есімхан Байназар мен Әль-фараби академиялық мектебінің бірінші сынып оқушысы Айсұлтан Азаматовқа берілді.
Салтанатты митингтен кейін мектеп көркемөнерпаздарының концерті өтті. Мектепке келген қонақтар білім ошағының оқу-материалдық базасымен, сондай-ақ, ұландардың тыныс-тіршілігімен таныс болды.
Айта кетсек, мектеп тәрбиеленушілері жалпы білім беру бағдарламасымен бірге, дене даярлығымен қарқынды шұғылданады және алғашқы әскери дайындықты терең зерделейді. «Жас ұлан» республикалық мектебінің көптеген түлектері әскери істі оқуды әрі қарай жалғастырып, әскери жоғары оқу орындарына түсуде және Қазақстан Республикасының Қарулы күштері мен өзге де әскери құрылымдардың лайықты офицерлері атанып жатыр.
Шымкент гарнизонының баспасөз қызметі
